Turplanlegging og terrengvurdering

Dagskurs på Mjølfjell Ungdomsherberge

2.januar, 9.januar, 22.februar, 5.mars, 20.mars 2021

Skred losnar ikkje kvar som helst og når som helst. Sjølv på dagar med varsla skredfare finst det skiturar du trygt kan gjennomføre. På dette dagskurset lærer du nokre metodar som gir sikre svar på kva terreng som er trygt å gå i og kva terreng du bør unngå.

vurdering_veivalg_800x600.jpg

Øv på trygge vegval 

Kursinnhald

Dette dagskurset er ein døropnar til vidare læring og bidrar til auka tryggleik på turane dine. Vi hjelper deg til å bli trygg på eigne vegval i vinterfjellet! Vi kombinerer teori og praksis slik at læringsutbyttet blir størst mogeleg.  

 

Denne dagen gir vi ei innføring i ein metode for turplanlegging, inkludert bruk av nokre nyttige digitale hjelpemiddel. Etter lunsj tar vi ein skitur i nærområdet der vi testar turplanen vår. Vi jobbar med å kjenne att skredterreng og å gjere gode vegval. Etter turen evaluerer vi dagen, for å sikre at erfaringane vi gjorde får nytte for oss på framtidige turar. Til inneøktene før lunsj har vi leigd kurslokaler med god plass. 

Når kurset er over skal du kunne bruke nokre viktige hjelpemiddel til systematisk turplanlegging, og vere i stand til å kjenne att skredterreng både på kartet og i terrenget. Kurset gir ei grunnleggande innføring i nokre tema som inngår i våre meir omfattande skredkurs og kurs i vinterfriluftsliv.

Nokre aktuelle moment denne dagen:

  • Turplanlegging med 3x3 filtermetoden til Werner Munter.

  • Lese og forstå vêrmeldinga på yr.no og skredvarselet på varsom.no.

  • Bruk av brattleikskart.

  • Kartlesing og ruteplanlegging.

  • Naudsynt utstyr.

  • Identifisere skredterreng.

  • Måle brattleik i terrenget.

  • Gjenkjenne og unngå terrengfeller.

Krav til deltakarar

Dagskurset passar for alle som ferdast på ski utanfor løypene i vinterfjellet. Du treng ikkje å ha kunnskap om skred, kart og kompass eller vere dyktig på ski. Kurset passar ôg godt for deg som har litt turerfaring, kan litt om skred og/eller treng å få kvalitetssikra din eigen kunnskap.

Deltakarar må vere i normal fysisk form, føle seg friske og vere utan symptom på forkjøling eller luftvegsinfeksjon. Vi følger dei gjeldande Covid-19 tiltaka og legg vekt på god handhygiene. Vi har redusert talet på plassar for å sikre god avstand mellom deltakarane.

Naudsynt turutstyr

Toppturski eller solide fjellski med feller. Vind- og vasstett bukse og jakke med god hette, ullundertøy, ekstra ulltrøye, varm lue, hanskar/vottar, og ein liten sekk med ekstra varm jakke. Alle har med skredutstyr (spade og søkestong). Hugs skibriller og hovudlykt. Ta gjerne med termos med varm drikke og eige kart og kompass om du har. Skredutstyr kan lånast av Wild Voss utan ekstra kostnad. 

Våre smitteverntiltak under Covid-19

Deltakarar på alle våre kurs må: 

  1. Føle seg friske og vere utan symptom på forkjølelse eller luftvegsinfeksjon.

  2. Ikkje vere omfatta av gjeldande karantenereglar.

  3. Oppretthalde god handhygiene undervegs på kurset.

  4. Halde minst 1 meter avstand til andre deltakarar.

  5. Som hovudregel sjølv ta hand om transport til og frå kurset.

Vi har redusert talet på plassar på dette kurset til 9, slik at maksimal gruppestorleik blir 10. Vi justerer kursopplegget slik at vi unngår nærkontakt både inne og ute. 

Her kan du lese vår oppdaterte risikoanalyse for smittevern og Covid-19.

Praktisk gjennomføring

Kurset finn stad på Mjølfjell Ungdomsherberge. Vi møtast utanfor hovudinngangen kl 9.30. Vi startar med ei inneøkt som held fram til lunsj. Inneøkta skjer i romslege lokaler der vi kan halde den naudsynte avstanden til kvarandre.  I pausene kan vi nyte herleg, ferskbrent kaffi frå Voss Kaffibrenneri, som held til på Ungdomsherberget. Etter matservering kler vi på oss og er ute resten av dagen. Vi avsluttar innan kl 16.30.

Kursleiarar er Øystein Ormåsen eller Carlos Abraldes Szigriszt. Dei driv Wild Voss i lag, og har lang fartstid som turleiarar, kursarrangørar og instruktørar.

Prisar og vilkår

Pris for dagskurset er kr 990,- per person. Inkludert i prisen er lunsj på Ungdomsherberget, kaffi/te, kursmateriell og kursleiing. Du får og låne skredutstyr (spade, søkestong) ved behov. Maks antal deltakarar: 9. Vi må ha minst 4 deltakarar for å gjennomføre.

Kostnader til transport for deltakarar kjem i tillegg. 

Les våre vilkår for påmelding og betaling her. 

 

Kontaktinformasjon:

Har du spørsmål om dagskurs, send epost til Øystein i Wild Voss: post@wildvoss.no eller ring på 93484041 .  

Øystein Ormåsen

Øystein er dagleg leiar i Wild Voss. Han er far til to og gift med Birte. Saman flytta dei til Voss i 2014, og etablerte verksemda året etter. Øystein er NF Skredinstruktør 1 Alpint, Breinstruktør 1 og Klatreinstruktør 1 Høgfjell. Han er kurshaldar i DNT og har leia ei rekkje ulike kurs og turar i høgfjellet sidan 2005. 

Please reload